Gjatë takimit u prezantua se çfarë është CBAM, pse është i rëndësishëm për Kosovën, lidhja e tij me Marrëveshjen e Gjelbër të BE-së dhe cilat janë implikimet financiare dhe sfidat që ky mekanizëm sjell për vendin tonë.

Në diskutim u trajtuan tema të rëndësishme, duke përfshirë statusin aktual të Kosovës në lidhje me CBAM dhe përgatitjet e deritanishme, rolin dhe kapacitetet e institucioneve, bizneseve dhe shoqërisë civile për të mbështetur zbatimin efektiv të këtij mekanizmi, masat e ndërmarra nga institucionet qeveritare për të siguruar pajtueshmërinë dhe integrimin e Kosovës, si dhe mbështetjen e nevojshme nga institucionet, partnerët dhe aktorët ndërkombëtarë gjatë fazës implementuese të CBAM, që për Kosovën pritet të fillojë në vitin 2026.

Falënderojmë panelistët për kontributin e tyre të vlefshëm, përfshirë Lulzim Korenicën nga Ministria e Ekonomisë (Energjia & Tranzicioni i Drejtë), Abdullah Pirçen nga Ministria e Mjedisit, Planifikimit Hapësinor dhe Infrastrukturës, Muela Ibrahimin nga Oda Ekonomike e Kosovës, Rinora Gojani nga Balkan Green Foundation dhe Arbnora Musliun, përfaqësuese e sektorit të biznesit nga Eurometal KS.

Nga ky takim doli si rekomandim që CBAM të promovohet më shumë dhe të diskutohet rregullisht në formate të ngjashme, për të forcuar bashkëpunimin ndërmjet sektorëve dhe për të siguruar një tranzicion të drejtë dhe të qëndrueshëm për Kosovën.

Ky aktivitet u zhvillua në kuadër të Projektit “Fuqizimi i Organizatave Mjedisore të Shoqërisë Civile në Kosovë” (EECSOK), i implementuar nga Fondi për Zhvillim Komunitar (CDF) dhe i mbështetur nga Ambasada e Suedisë në Prishtinë (Embassy of Sweden in Pristina).