Gjatë takimit u diskutuan çështjet aktuale lidhur me deklarimin e çmimeve me shumicë dhe pakicë të produkteve medicinale, vendime të lëshuara së fundmi nga Ministria e Shëndetësisë.

Temat e diskutimit në këtë takim përfshinë:

1. Vendimi dhe lista e çmimeve të publikuara për produktet medicinale nga Ministria e Shëndetësisë më datë 06.09.2024.

2. Impakti dhe rreziku potencial për sektorin farmaceutik.

3. Veprimet dhe gjetja e një zgjidhjeje.

Përcaktimi i marzhës së fitimit, problem i madh në ushtrimin e veprimtarisë biznesore në sektorin e farmacisë

Pikat kryesore të diskutimit përfshinë shqetësimet për kostot operative, kornizën ligjore për deklarimin e çmimeve dhe hapat që do të ndërmerren për adresimin e këtyre çështjeve përmes procedurave administrative dhe ligjore.

Oda Ekonomike e Kosovës do të angazhohet për të ndikuar në largimin e këtyre barrierave, me qëllim që bizneset të mos pësojnë humbje dhe të sigurohet qëndrueshmëria e tyre në treg. Palët janë dakorduar që të vazhdohet me përpjekje të përbashkëta, në bashkëpunim me institucionet përkatëse, për të gjetur një zgjidhje të drejtë dhe të qëndrueshme.

Shoqata e Distributorëve të Produkteve Farmaceutike dhe Medicinale të Kosovës ka përkrahur vazhdimisht procesin e nivelizimit të çmimeve të produkteve farmaceutike në territorin e Kosovës, në mënyrë që pacientët të kenë çmime të barabarta kudo që ndodhen. Megjithatë, Kosova mbetet i vetmi shtet në Evropë që nuk ka sigurime shëndetësore funksionale që është një faktor thelbësor për rregullimin e çmimeve të shërbimeve mjekësore dhe farmaceutike.

Lista e çmimeve të produkteve farmaceutike, e publikuar më datë 06.09.2024 nga Ministria e Shëndetësisë, ku në shumicën e rasteve është caktuar një marzhë prej vetëm 7.5% për qarkulluesit farmaceutik, është tejet shqetësuese për anëtarët e Shoqatës, kjo për shkak se:

– Është në kundërshtim me metodologjinë e përcaktimit të çmimeve sipas Ligjit Nr. 08/L-220 për Çmimin e Produkteve Medicinale.

– Nuk garanton ekzistencën e veprimtarisë së qarkulluesve farmaceutikë me shumicë.

– Rrezikon furnizimin me produkte farmaceutike për pacientët në Kosovë, si e drejtë fundamentale e tyre.

– Zvogëlon numrin e barnave të regjistruara dhe do të ndikojë në largimin e prodhuesve serioz ndërkombëtar nga tregu i Kosovës, duke konsideruar se Kosova është një nga tregjet farmaceutike më të varfëra në Evropë.

Shoqata deklaroi se në këtë gjendje për shumicën e prodhuesve të produkteve farmaceutike, Kosova është vend pa ndonjë interes ekonomik. Këto masa të ndërmarra nga Ministria e Shëndetësisë mund të rrezikojnë seriozisht shëndetin publik në Kosovë, pasi edhe në ditët e sotme, në portofolin e barnave të regjistruara, mungojnë produkte esenciale shumë te rëndesishme të cilat pacientët janë të obliguar të furnizohen nga tregjet jashtë vendit.

Shoqata e Distributorëve të Produkteve Farmaceutike dhe Medicinale të Kosovës konsideron se lista e publikuar nga Ministria e Shëndetësisë më datë 06.09.2024, sipas Ligjit Nr. 08/L-220 për Çmimin e Produkteve Medicinale, ku në shumicën e rasteve është caktuar kundërligjshëm një marzhë prej vetëm 7.5% të çmimit doganor (pa përfshirë shpenzimet bazike, si: 1% AKPPM, shpenzimet për banderola, marketing, autorizimet për regjistrim dhe variacionet e produktit në AKPPM, farmakovigjilenca, si dhe në shumicën e rasteve as shpenzimet e transportit), e pa përfshirë shpenzimet operative të qarkulluesve farmaceutikë, do të dëmtojë seriozisht shumicën e anëtarëve duke rrezikuar aktivitetin e tyre ekonomik.

Si përfundim, nëse kjo situatë nuk ndryshon, Shoqata theksoi se do të jenë të detyruar të ndërmarrin të gjitha hapat e nevojshëm ligjorë për të mbrojtur interesat e tyre dhe për të siguruar qëndrueshmërinë e sektorit farmaceutik në Kosovë.