Sot, me datë 20 shkurt 2024, Kryetari i Odës Ekonomike të Kosovës, Lulzim Rafuna, ishte pjesë e takimit të Këshillit Kombëtar për Ekonomi dhe Investime, i organizuar nga Zyra e Kryeministrit të Republikës së Kosovës në bashkëpunim me Sekretariatin e Këshillit Kombëtar për Ekonomi dhe Investime (KKEI).
Si përfaqësues i komunitetit të biznesit, z. Rafuna prezantoi një sërë propozimesh për të adresuar sfidat dhe për të inkurajuar zhvillimin ekonomik të vendit tonë, të cilat ishin:
– Konsultimi me Odën Ekonomike të Kosovës dhe me bizneset e vendit për ndryshimet në legjislacione që afektojnë sektorin privat, për tu siguruar që ato janë në përputhje si dhe të favorshme për sektorin privat;
– Reformimi dhe rifreskimi i politikave fiskale dhe ligjeve ndërlidhëse për të përmirësuar mjedisin e biznesit dhe për të inkurajuar investimet në Kosovë;
– Lirimi i veturave elektrike nga TVSH, për të promovuar përdorimin e këtyre mjeteve të transportit dhe për të ndikuar në një mjedis më të pastër ambiental;
– Funksionalizimi i diplomacisë ekonomike për të hapur rrugë të reja për tregti dhe investime, duke përmirësuar lidhjet ekonomike ndërkombëtare të Kosovës;
– Pagimi i TVSH-së pas shitjes së produkteve të importuara, për të zvogëluar ngarkesën financiare për kompanitë vendore.
