Kryeministri i Republikës së Kosovës, Albin Kurti, i shoqëruar nga Shefi i Stafit të Kryeministrit, Luan Dalipi, mirëpriti Vladimír Dlouhý, President i Eurochambres, shoqatë e odave ekonomike evropiane dhe Kryetarin e Odës Ekonomike të Kosovës, Lulzim Rafuna. Z. Dlouhý është ekonomist i njohur nga Çekia, me përvojë të gjerë edhe në politikë, si ish ministër i ekonomisë së Republikës Çeke.

Në këtë takim u diskutua rëndësia e krijimit të kushteve sa më të favorshme të të bërit biznes, ofertën e vendit tonë për bizneset e huaja, dhe përshpejtimin e zhvillimit ekonomik të Kosovës përmes investimeve të përbashkëta dhe inovacionit.

Eurochambres, e themeluar në vitin 1958, përfaqëson mbi 20 milionë biznese nëpërmjet 1700 odave ekonomike anëtare në të gjithë Evropën. Në mesin e tyre anëtare është edhe Oda Ekonomike e Kosovës.

Në takim morën pjesë gjithashtu Ben Butters, Sekretar i Eurochambres dhe Besim Mustafa, Drejtor i Departamentit për Bashkëpunim Ndërkombëtar në Odën Ekonomike të Kosovës.

Burimi: Zyra e Kryeministrit të Republikës së Kosovës