Oda Ekonomike e Kosovës (OEK) dhe Eurometal Academy kanë nënshkruar një Memorandum Bashkëpunimi, me qëllim forcimin e bashkëpunimit në fushën e arsimit profesional dhe aftësimit teknik.

Ky memorandum parasheh zhvillimin e trajnimeve dhe certifikimeve profesionale për të rinjtë dhe të rriturit e interesuar në fushën e saldimit dhe profesioneve të ngjashme teknike, me qëllim ngritjen e kapaciteteve profesionale dhe përmirësimin e punësueshmërisë së fuqisë punëtore në Kosovë.

Përmes këtij partneriteti, OEK dhe Eurometal Academy do të bashkëpunojnë në zhvillimin e programeve praktike të aftësimit, të cilat janë të harmonizuara me kërkesat reale të tregut të punës, duke kontribuar në rritjen e konkurrueshmërisë dhe zhvillimin ekonomik të vendit.

Ky bashkëpunim paraqet një hap të rëndësishëm drejt fuqizimit të arsimit profesional si faktor kyç për zhvillim të qëndrueshëm ekonomik dhe social në Kosovë.