Kryetari i Odës Ekonomike të Kosovës, z. Lulzim Rafuna, ka theksuar gatishmërinë për të forcuar bashkëpunimin ndërmjet Odës dhe sektorit mikrofinanciar, si një hap i rëndësishëm drejt fuqizimit të ndërmarrësisë dhe zhvillimit të qëndrueshëm ekonomik në vend.

Kryetari i Odës Ekonomike të Kosovës (OEK), z. Lulzim Rafuna, priti përfaqësuesit e Shoqatës së Institucioneve Mikrofinanciare të Kosovës (AMIK), për të diskutuar mundësitë e bashkëpunimit mes sektorit mikrofinanciar dhe biznesit vendor.

Në takim morën pjesë Kryetari i Bordit të AMIK, z. Adrian Alo, dhe Drejtori Ekzekutiv, z. Shpresim Vranovci. Diskutimet u fokusuan në fuqizimin e ndërmarrësisë, rritjen e qasjes në financa për bizneset dhe promovimin e zhvillimit të qëndrueshëm ekonomik në vend.

Kryetari Rafuna theksoi gatishmërinë e OEK për të krijuar ura lidhëse mes bizneseve dhe institucioneve financiare, duke mbështetur rritjen e ndërmarrjeve vendore. Ndërkaq, përfaqësuesit e AMIK ritheksuan përkushtimin për të forcuar rolin e mikrofinancës dhe për të kontribuar në zhvillimin ekonomik dhe shoqëror të vendit.