Prishtinë, 05.11.2025 – Sot, në Gjykatën Supreme të Republikës së Kosovës, Oda Ekonomike e Kosovës (OEK) ka zhvilluar seancën gjyqësore kundër Zyrës së Rregullatorit për Energji (ZRRE), lidhur me daljen e detyrueshme të bizneseve në tregun e lirë të energjisë elektrike.

Avokati i OEK-ut, Ekrem Hoxha, argumentoi se procesi i liberalizimit të tregut nuk ka respektuar ligjin dhe direktivat evropiane, duke shkaktuar dëme materiale për komunitetin e bizneseve. Vendimet e ZRRE-së, sipas tij, kanë favorizuar operatorë të caktuar dhe nuk kanë garantuar konkurrencën reale dhe furnizimin e duhur për konsumatorët.

Kryetari i OEK, Lulzim Rafuna, theksoi:

“Vendime që nuk përputhen me ligjin dhe direktivat e BE-së kanë ndikuar drejtpërdrejt në bizneset e Kosovës. Ne besojmë se Gjykata Supreme do të shqyrtojë të gjitha provat dhe do të vendosë një vendim të drejtë, që mbron interesat e bizneseve dhe zhvillimin ekonomik të vendit.”

OEK shpreh besimin se drejtësia do të mbrojë komunitetin e biznesit dhe do të sigurojë që proceset e liberalizimit të tregut të zhvillohen në përputhje me ligjin, parimet e transparencës dhe konkurrencës së drejtë.