Oda Ekonomike e Kosovës ka përshëndetur rifillimin e punës në Comodita Home vetëm tri ditë pas incidentit në Gjakovë. Kryetari i OEK-ut, Lulzim Rafuna, e cilësoi këtë si një lajm shumë të mirë për ekonominë e vendit, duke theksuar se rikthimi në kohë rekord tregon menaxhim të fortë dhe qëndrueshmëri të sektorit privat.

“Ky është një lajm i shkëlqyer për ekonominë e vendit. Në këtë rast duhet përgëzuar drejtuesit e kompanisë, veçanërisht Shkëlqim Devollin, i cili arriti që në kohë rekord ta rikthejë fabrikën në funksion, duke siguruar që punëtorët të mos ndjejnë pasojat e ndaljes së prodhimit dhe të mos ketë ndikim negativ në eksport,” tha Rafuna.

Oda Ekonomike e Kosovës vlerëson lart solidaritetin e punëtorëve dhe përkushtimin e menaxhmentit të Comodita Home, duke e konsideruar këtë rast një shembull pozitiv të qëndrueshmërisë së biznesit kosovar dhe të rolit kyç që industria prodhuese ka për zhvillimin ekonomik të vendit.